In 1884 het dominee Van Zyl die Nederduitse Gereformeerde Kerkskool gestig. Die eerste onderwysers was Soph, Telètt, McKlene en Knoebel.

Die bou van die klipgebou onder Hoy's Koppie het in 1907 begin en die gebou het in 1911 in gebruik geneem met mnr SG du Toit as skoolhoof, mej Bredenkamp verantwoordelik vir sub. A en B, mnr Paterson vir st. 1 tot 4 en juffrou Neethling vir st. 5 en 6. Nederlandse en Engelse leerlinge is saam in dieselfde klas onderrig.

In 1941 het die skool senior skoolstatus verwerf. Mnr BJ Joubert (Oom Joepie) het die pos van waarnemende skoolhoof van 1940 tot 1945 beklee terwyl mnr Lomberg aan die Tweede Wêreldoorlog deelgeneem het. Mnr Lomberg het nie na die oorlog teruggekeer nie, maar het eerder hoof van Observatory Boy's High School geword. Mnr HC Jones het in Januarie 1946 as hoof van die skool by mnr Joubert oorgeneem. Die senior en laerskole het in 1952 geskei en mnr NPJS van Staden is as hoof van die laerskool aangestel. Beide skole het op dieselfde gronde voortbestaan. In 1962 het mnr BA Kuyler hom opgevolg en in 1978 word mnr HB Nell as skoolhoof aangestel. Mnr Nell het op 31 Maart 1995 afgetree. Mnr JB Cilliers het in 1995 skoolhoof geword.

Sedert 1995 het die ouers van Laerskool Hermanus die volgende verbeterings vir eie rekening onderneem: Bou van die skoolsaal, bou van 10 klaskamers, 4 motorhuise, 'n snoepie, pawiljoen, klubhuis, kleedkamers, twee admin blokke, drie hokkievelde, astro en outomatiese besproeiing vir die sportvelde. Baie ander kleiner projekte is ook voltooi.

Mnr Cilliers het aan die einde van 2022 afgetree na 42 jaar diens, 27 jaar as skoolhoof. Ons is dank verskuldig aan hom vir die uitstekende groei wat hy beywer het. Ons is bevoorreg om mnr du Preez ons skool te laat lei gedurende die 2023 skooljaar.